Sri Lanka minung 250 thahnak hnuzul: Khrihfa nih zohchia ngai in Muslim an lehrulh hna

Easter Sunday pumh lio ah Muslim ralhrang nih Sri Lanka Khrihfa le hotel cheukhat bomb an puah hnawh hna i minung 250 leng an thah hna ruang ah Khrihfa nih Muslim an lehrulh ve hna.

Roman Catholic(RC) tamnak khua ah Muslim dawr le an thilri hna cu mino phu nih an hrawh piak hna, mei an khangh piak fawn hna. Muslim pakhat zong thah a tong. Khuaci an mui ko.

Khua cheukhat ah cun Muslim an biakinn zong an hrawh piak hna, Muslim caah Bible bantuk a simi Quran zong an khangh i an thlek dih. Muslim tampi thinphang in an um.

Sri Lanka police nih an si khawh chung in buainak a tuahtu hna cu an tlaih hna, meithal zong an puah hnawh hna. Atu hi zaan ah aleng chuah lo ding timi curfew zong an thanh cang fawn.

Buainak a karh chin sual lai an phan caah tuhi cozah nih Facebook le a dang social media vialte an phih chung.

Sri Lanka hi Myanmar bantuk in Buddhist an tamnak a si. Muslim cu 10% lawng an si. Buddhist le Muslim an i rem tawn lo, nain atu cu Muslim le Khrihfa kar ah buainak a um hi a si. BBC