US Alabama: Nauthah ‘abortion’ kong ah strict takmi upadi thar an ser, an buai ngai

Republican an tamnak Alabama state ah MP hna nih nauthah kong ah strict takmi upadi thar an ser i liberal an buai ngai, mah bantuk upadi hi fehter awk a si lo an ti.

Mah upadi hi an nunter ahcun nauthah khawh a si ti lai lo, hringtu nu nunnak caah phan awk a um lawng ah nauthah khawh asi lai. Tlaihhrem le chungkhat nih nau pawiter sualmi zong thah khawh a si ti lai lo.

Upadi thar a nun ahcun nauthah(abortion) a tuah piaktu siibawi cu kum 99 bak thongthlak a si lai.

MP hna nih cu upadi thar cu an fehter cang ko nain Alabama governor nih min a thut rih lo, khua fak piin ka ruah hnu ah biachahnak ka tuah te lai a ti. Amah minthut lo cun upadi a nung kho lai lo.

Governor nih min a thut zong ah biaceihzung ah liberal pawl nih an chuahpi te lai, biaceihzung niam deuh ah upadi thar an thihter sual zong ah Supreme Court tiang phak pi khawh a si.

Alabama MP hna nih biaceihzung niam deuhmi ah cun upadi hi an thihter ko lai timi an ruah cia, nain Supreme Court ah Republican thimmi biaceihtu an tam deuh caah upadi thar hi an nunter ko lai timi ruahchannak an ngei.

President Trump hruaitu a si hnu in US state tampi nih nauthah kong ah a strict deuhmi upadi thar an ser len. Hi upadi an sermi kong ah nu le liberal tampi cu an lungrawk i an buai. BBC